जिनसेनाचार्य
आचार्य जिनसेन (द्वितीय) हे इ.स. आठव्या-नवव्या शतकातील दिगंबर परंपरेतील अग्रगण्य आचार्य होते. ते आचार्य वीरसेनांचे शिष्य असून राष्ट्रकूट सम्राट अमोघवर्ष (प्रथम) यांचे गुरू मानले जातात. गुरू वीरसेनांनी अपूर्ण ठेवलेली कषायप्राभृतावरील 'जयधवला' टीका (सुमारे ४०,००० श्लोक) त्यांनी इ.स. ८३७ मध्ये पूर्ण केली.
त्यानंतर त्यांनी 'महापुराण' रचण्यास सुरुवात केली; त्याचा पूर्वार्ध 'आदिपुराण' ४२ पर्वांपर्यंत लिहिल्यानंतर त्यांचे समाधिमरण झाले आणि शिष्य गुणभद्रांनी ते पूर्ण केले. (हरिवंश पुराणाचे कर्ते जिनसेन (प्रथम) हे वेगळे आचार्य आहेत.)
प्रमुख ग्रंथ: जयधवला टीका (उत्तर भाग), आदिपुराण, पार्श्वाभ्युदय काव्य.
रचलेले आगम ग्रंथ
आदिपुराण
आदिपुराण हे जिनसेनाचार्यांनी रचलेले संस्कृत महाकाव्य असून त्यात प्रथम तीर्थंकर ऋषभदेवांचे चरित्र वर्णिले आहे. आदिपुराणात भगवान ऋषभदेव व भरत चक्रवर्ती यांचे चरित्र आहे; उत्तरपुराणात उर्वरित २३ तीर्थंकर, ११ चक्रवर्ती, ९ बलभद्र, ९ नारायण आणि ९ प्रतिनारायण यांची चरित्रे आहेत.